تاريخ آخر دورة 25/5/2021 .. كان عندي طلق من بداية الشهر الثاني بس الرحم مسكّر .. ع العموم ولاداتي كلها لازم تحريض دخلت التاسع والطلق يزيد بشكل فضيع (( الطلق عباره عن تحجر في البطن يشد بشكل غريب وكأنك في ضغط جوي وفجأة يفك)) المهم انه من دخلت التاسع اخترت تاريخ الولاده .. أولاً لانه مميز.. ثانيًا لأنه اجازه وانا عندي أولاد يدرسوا وولد عمره سنتين .. المهم جات ليلة الثلاثاء ودخلت التنويم .. الحمدلله ما احتجت جل توسعه ولا طلق ولا اي خرابيط لأن اول مادخلت يدها لقت الرحم مترقق والتحريض سريع .. تيسرت الامور واشتد الطلق وطلبت ابرة الظهر ((رحمة ونعمة من الله )) واي وحده تلقى فرصة تاخذها لاتتردد ((تخفف الالم من 100٪؜ لغاية 5٪؜)).. طبعًا انا عندي ولادات سابقه وكلها سريعه وماقد استخدمت ابرة الظهر بس رغم سرعة الولاده الا اني كنت اعض الارض من الألم وبدون صوت .. المهم هذه الولاده الاولى بابرة الظهر والحمدلله تجنن وناسبتني خاصةً ان عندي الام بالحوض وعظام العانه والطفل ضاغط على اعصاب الرجل كون ان حجمه كبير تبارك الله .. اخذت الابره الساعه 12 الظهر .. جات طقت موية الجنين الساعه 1 ولدت الساعه 1:40 .. سبب التأخير انه كانوا ينتظروا دكتورتي اللي متابعه معي تفضى لي .. ع العموم الدفه الاولى كانت بمساعدة الدكتورة المناوبة .. والثانيه والثالثه بيد دكتورتي اللي بدعي عليها ليل ونهار .. لاني ما شفتها الا لحظة الولادة (( قبلها مالمحتها)).. جت وسعت بشكل طولي وخيطت خياطه داخلية وهالشيء جديد جدًا علي (( وسعت وضيقت .. وخبصت وانا متخدره ما احس بشيء صراحه )).. لما طلع البيبي (( انثى )).. فرحتي عظيمه خاصةً ان خلفتي السابقه كلهم صبيان .. فرحت فيها .. الله يبلغنا بذرياتنا ويجعلنا قرة عين لبعضنا 💓 المهم سألت الدكتوره كيف الخياطه كم غرزه (( قالت خيط كامل متواصل ماعندي غرز انا )).. قلت غريبه قالت بكره بس امر عليك احكيك كيف تنتبهي على الغرز وما الى ذلك.. المهم فك التخدير ولسا الوضع تمام وما احس بأي الم الا ان غازات وامساك وانتو بكرامه .. لما دخلت الحمام اخر الليل ابغى نمبر 2 ماقدرت والألم انتشر في كل المنطقه ولاعد عرفت الغرز على اي جهة بكيت من الالم .. كلمتهم جابولي مسكن.. قلت لهم جيبوا الدكتوره ايش سوت فيني فيه شي غلط .. الوضع لايطاق قالولي الصباح تمر عليك .. ومن الالم مانمت (( الخياطة سيئة جدًا مع ان الدكتوره معروفه وشغلها نظيف بس جات عندي ووقفت حسبي الله )).. المهم ان ولادتي كانت تجنن بماتعنيه الكلمه .. زوجي معي وضحكنا ودعينا بوقت الولاده كانت حقيقي نفس اللي نشوفه بالأفلام والمقاطع .. بعد عشر ايام راجعت الدكتوره وقالت راح تعيدلي الجراحة من جديد باذن الله بعد شهر من الولاده والان لي 15 يوم وكل شي عال العال عدا الالم في المنطقة السفليه لان الخياطة ممتده من الجهاز التناسلي الى فتحة الشرج بخط طولي وملتهب وانفتحت من البدايه .. وانفتحت من النهاية فجاتني بواسير .. وتوها بعد عشر ايام من الولاده توصفلي اللي المفروض توصفه من اول يوم بس للاسف للزحمة سقطت وصفتي سهوًا وعانيت كم يوم بعد الولاده لكن الحين انا مره افضل ومبسووووطه جدًا .. تخطيت موحلة تحجر واحتقان الصدر .. وتقلصات الارحام بعد الولاده واثناء الرضاع.. استعدت جزء كبير من ثقتي بنفسي خاصةً بعد مانزل وزني شويات والبطن مع المشد بدأت تروح الحمدلله .. والتهاب الغرز راح والالم حقها اذا جاتني نغزات اخذت مسكن ..