السلام عليكم ورحمة الله وبركاته كيفكم بنات زي ماوعدتكم اكتبلكم كل شيء بالتفصيل🙂 نزلته موضوع جديد عشان الجميع يستفيد وطبعاً خاصةً اللي تابعوني من اول الشهر التاسع انتوا عاد اخواتي الله يحفظكم ويسعدكم جميعًا يارب❤️ طيب قبل ماابدء بيوم الولادة بس حابة اقول للبنات الي ماتعرفني انه هادي ولادتي الخامسة ماشاءالله وعنق الرحم عندي في كل ولاداتي دايماً سميك ومايفتح بسرعة ولما يبدء الطلق معايا يشد وينتظم كل دقيقتين لكن يجلس معايا يومين او ثلاث ايام وبعدها يفتح 1 سم فقط وبعد ثلاث ايام من الالم المميت وعدم النوم وعدم الاكل لما يفتح 3 او 4 سم ياخذ تقريباً 12 ساعة عشان اوصل للعشرة سم والولادة… هادي ولاداتي السابقة ولادتي هادي مختلفة ولله الحمد🌺 البداية كانت يوم الاثنين من الصباح بدء الالم المعتاد اللي صايرلي فترة اشتكي منه زي الطلق ينتظم كم ساعة وبعدين يختفي نمت على الساعة 10 الصباح وصحيت 12 الطهر نومتي قلق الين هنا هادا كله عانيته اخر اسبوعين في التاسع مافي جديد الساعة 2 الطهر جاني الالم من جديد ومو قادرة ارجع انام نفس الالم حق الطلق الكاذب المستمر من ايام مافي جديد لكن الجديد كان انه لما غفيت الألم صحاني هو كان محتمل جداً لسى مو مؤلم بس صحاني ونهاية الشد جاني زي الرجفة في يدي كل مايجيني الشد تجيني الرجفة وصرت بردانة… طبعًا هنا بديت أشك لاني من النوع اللي دايماً حراااانه صيف شتاء جداً حرانه ماابرد المهم العصر دخلت الحمام شفت دم احمر الله يكرمكم وطبعًا ماكانت السدادة بحكم ولاداتي انا اعرف السدادة طبعاً خفت واتصلت على زوجي قلتله نروح الطوارئ عبال وصلنا المغرب الطواريء الدكتورة ماظهر معاها الدم الاحمر وقالتلي عنق الرحم مقفل تماماً وسميك وفوق لكن نكتبلك تنويم نصور نتأكد مو بداية انفصال في المشيمة وبكرة طلق صناعي لاني طبعاً مخلصه الشهر التاسع من ثلاث ايام رفضت وخرجت على مسؤليتي اللي متابعينني يعرفوا التفاصيل 🌹 المهم رجعت بيتي كمية احباااااط وطبعاً من يوم رحت المستشفى الالم اختفى تماماً مع الخوف😂 النية اني انام الساعة 12 في الليل رجع الالم وصحاني وكل ماغفيت يصحيني تقريباً كل 20 دقيقة دهنت بطني وظهري زيت زيتون حاااار وبعدين اتروشت بموية حااااارة وشربت نعناع عشان اشوف الالم حايستمر ولا كيف.. الساعة 1:30 الليل تقريباً صار الالم كل 10 دقايق ونسيت اقولكم من الساعة 12 بدئت افرازات السدادة تنزل بس هادي المرة الله يكرمكم بدم اكثر من ولاداتي السابقة الهم الالم مازال عادي محتمل جداً جداً بس منتظم مو الم الطلق الموت اللي اعرفه ،، شربت كاسة حليب بالزعفران وعسل اصلي وطلعت الدرج ونزلته تقريباً 10 او 15 مرة يعني قد ماقدرت بدون مااجهد نفسي لاني ايقنت إن شاء الله انها ولادة ماابغى اتعب لكن كنت ادعي ربنا مااطول زي كل مرة انتظرت الين الساعه 6 الفجر وصحيت زوجي قلتله يروح الصلاة ويرجع يوديني المستشفى وقلتله لو تبغى تودي بنتي المدرسة عادي استناك كمان 😅 لاني طبعاً شايفة الالم جداً محتمل مستحيل يكون فتح الرحم توها في الليل قالت مقفول لكن ابغى اروح بدري عشان ابغى ابرة الظهر قبل يشد علي ونسيت اقولكم انه تقريباً من الساعة 3 صار الالم كل اربع دقايق المهم زوجي قالي بلا مدرسة بلا خرابيط اوديكي انتي اول اتروشت بموية حااااارة وبعدين رحت المستشفى وفي طريقي للمستشفى شربت نص قارورة موية زمزم صغيرة منقوع فيها زعفران اصلي وموية ورد من اسبوع ع اساس اكمل بقية القارورة في المستشفى لكن الدكتورة منعتني … الساعة 7 الصباح وصلت المستشفى كان الطلق كل دقيقتين تقريباً لكن الالم محتمل جداً عكس الموت اللي اعرفه في طلقي ونسيت اقولكم انه في البيت لما كانت تجيني الطلقة كنت اسوي قرفصاء واتنفس شمي وردة وانفخي شمعه واقرء قران بنية ربي يسهلي ويخفف المي ومااطول واشرب موية زمزم مقرية المهم سوتلي تخطيط عشان نبض البيبي والطلق ويضحكوا قالوا مو انتي اللي رفضتي التنويم قبل كم ساعة🌝😤 بعد التخطيط قالت تنويم تلقائي قلتلها لا ليش!!؟😂😂😂 متعودة ارفض التنويم قالت طلقك ماشاءالله منتظم وقوي تبغي تخرجي😳 بعدها استوعبت انه الوضع اختلف 😁 كشفت الدكتورة قالت 3 سم ومفتوح تماماً مافي سدادة بالرغم الافرازات ماكانت بالكثرة زي ولاداتي السابقة لكن سبحان الله وقالت طلقك قوي وماادري نلحق نعطيكي ابرة الظهر او لا لأنه كده حايفتح بسرعة واحنا لازم نسويلك تحاليل دم تطلع بعد ساعة بعدها نعطيكي ابرة الظهر لكن لو فتح الرحم 5 سم مانقدر نعطيكي اقصى شيء 3-4 سم نعطيها،،، الساعة 9 طلعت النتايج وكلمولي دكتور التخدير لكن عبال جا 9:30 نزلت الموية دفعة واحدة فحصتني قالت 5 سم والطلق الالم زاد لكن طووووول وقت الطلق بعد ماارتاح من الطلقه اقرء قران وادعي وادعي والله ثم والله كان اقل الم الحمدلله قسم بالله يابنات دكتور التخدير شاف الطلق قال ماحاينفع معاها الابيدورال ابرة الظهر طلقها جداً قوي حايتخفف بنسبة 20٪؜ حتى لو اعطيتها اعلى نسبة وانا ادعي ربنا يجعله برداً وسلاماً الساعة 10 فحصتني بعد نزول الموية قالت 5 سم ايش رايك اعطيكي طلق صناعي طبعاً عصبت وقلتلها لا طلق رب العالمين وبس تستهبلي ماابغى اسرع شيء 10:30 قلتلها انا باولد قالت مستحيل توي فحصتك قلتلها والله باولد حاسة راس البيبي تحت كاني باتبرز الله يكرمكم لكن حاسة بالراس حرفياً وهي بتنزل وجسمي بيدف غصب عني قالت طيب دحين افحصك تخيلوا تقولي دقيقة لاتدفي البس بس الجونتيات قاست قالت 10 سم كاااامل😍😃 وتقولي بس ثواني اغير الجونتيات طبعاً مع نفسها وقت الطلقة غصب عني ادف وبعدين لما جا وقت الدف كنت اتنفس بهدوء ابغى اعطي الدكتورة فرصة ماابغى ادف بقوة لكن بسم الله ماشاء الله اتزحلقت بنتي من اول دفة اللهم بارك ولله الحمد اولاً واخيراً قبلًا وبعداً الحمدلله الحمدلله الحمدلله حتى يبلغ الحمد منتهــــاه ❤️❤️ نصيحتي لكم القران ثم القران ثم القران والدعاء والذكر والله انا ماخليت شيء ماجربته ولا شربته ومافاد معايا شيء ابداً اخر يومين صرت اصلي في الحرم وقباء ادعي ربنا يفرجها علي ويسهلي واستخير في الطلق الصناعي والتنويم ويوم الطلق ماسيبت القران الين قبل ولادتي بنص ساعة والادعية واحسنت الظن بالله كنت متيقنه ودايماً بنات القروب اقولهم ربي حايعوضني الانتظار هادا بولادة غير وسهلة وربي حبيبي ماردني الحمدلله الحمدلله نسيت اقولكم زوجي راح يودي بنتي المدرسة ومالحق يجيبلي الشنطة الا اني والدة قال كان عارف حاطول وقال الظهر يجيبها بعد مايرجع بنتي 😂😂😂 طبعاً مااحتجت الشنطة لانه المستشفى حقتي توفر كل شيء لي وللبيبي ملابس وادوات نظافة وحفايض وفوط صحية وملابس داخلية استعمال واحد كل شيء يوفروه بس احتاج الشنطة عشان لما ابغى اخرج إن شاء الله من المستشفى وطبعاً هنا يقعدوني 24 ساعة بعد الولادة يطمنوا علي وعلى البيبي إن شاء الله يكتبولي خروج اليوم🌹🌺 وهادي قصتي بالتفصيل الممل😊😊