2 years ago
  • المرحلة الثالثة (الأشهر 9,8,7)
ممكن قائمة لوازم الرضيع والام

2 تعليقات

العضوة: 1606434 , 2 years ago

ملابس داخليه -طقم لبس سواء صيفي او شتوي - حفاضات - كريم للمنطقة الحساسة - مناديل مبلول لتنظف المنطقه الحساسه عند الطفل، يفضل ماتستخدمينها كل اليوم، يعني مره بالمنديل مره تغسلين بالماي وهكذا، لان كثرة الاستخدام تسوي حساسية، او لو طالعة استخدمي او على قد المشوار او مستعجله - صابون (اثنين في واحد شامبو وصابون لتنظيف الجسم) - ممكن لو الجو برد، قفازات وشرابات للطفل - كريم ترطيب لجسم الطفل من بعد مايتحمم - بزازات او لهاية او سكاته(لها تسميات كثير؛ ممكن تعطينها للطفل من اول ماينولذ بس ياريت للضروره فقط، يعني تاركه الطفل ورايحه الحمام، ممكن تساعدج انها تهديه لين تردين من الحمام وترضعينه - اما للام فتحتاج، فوط صحيه عشان النزيف، ملابس داخليه وطقم صيفي او شتوي، هاتي اثنين عشان لو صار تسريب وانتي في المستشفى، ممكن بعد تجيبين كريم لترطيب الحلمات، بس احرصي انه يكون من النوع اللي عادي الطفل يرضع بيه، بس طبعا انتي اغسلي الحلمه قبل كل رضعه عشان تتخلصين من الكريم ومنها للنظافه بس بدون صابون عشان ماتنشف المنطقه وتتقطع بسرعه… ممكن تغسلينهم بالصابون مره وحده باليوم فقط وبعدها على طول ترطيب وبالتبادل بين صدر وصدر، الصدر اللي راح يرضع منه نظفيه واتركي الثاني مترطب، اول فتره لازم تركزين على ترطيبهم - وممكن شاشات قطن للحلمات، تنباع فالصيدليات عشان بعد الرضاعه يصير تسريب في الملابس… ( انا جاوبت على احتياجات الشنطه وزياده فقط من باب الفايده لانج ممكن تكونين ام لأول مره وهذا سبب السؤال) مب لازم تجيبين كل شي، هاتي الضروريات، والكماليات بعدين ❤️ الله يرزقج ولاده مباركه وطفل سليم مبارك ❤️

العضوة: 1606434 , 2 years ago

انا افترضت انج قصدج اللوازم للمستشفى، او اول ثلاثة ايام… لو حابه معلومات اكثر، راح تحتاجين بفيته (عبارة عن قطعه تتعلق حوالين رقبة الطفل عشان يوم يرجع الحليب بعد كل رضعه، طبعا اكيد راح يعلمونج كيف تكرعين الطفل ولو شرق كيف تتصرفين، ضروري تتعلمين هالشي لان ابني شرق مني وهو عمره اسبوع ولولا ان حماي عارف الاسعافات الاوليه كان راح مني، وشرق اكثر من مره وربي وفقني اتصرف) راح تحتاجين سرير متحرك في البيت سواء (بيبي نيست او كرسي مريح ينام عليه وانتي في الصاله او حتى car seat, كنت استخدمه في البيت عشان اتحرك بالنونو في كل البيت… انتبهي تشيلينه وانتي تطبخين… راح يعلمونج انه الطفل لازم ينام على ظهره لكن احرصي ان راسه متوجهه ع اليمين او اليسار عشان لو رجع وهو نايم ماينخنق) راح تحطينه بين مخدتين عشان ماينقلب… واخيرا طبعا راح تحتاجين رضاعه وحليب صناعي مناسب وتتعلمين كيف تستخدمينه، راح ينفعج في حالة تعبتي خلال اليوم، تقدرين تعطينه رضعه وحدة في الليل مثلا، لكن نصيحه الرضاعه الطبيعية كنز وشي مهم لمناعة الطفل، الصناعي نعمة من الله خصوصا للاطفال اللي عندهم حساسية البان ولاكتوز(ابني منهم) ع الثلاث شهور كان يتبرز دم واعراض كثيره لين منعوني اني ارضعه غير يوم يتصفى لبني، راح تكتشفين ان كل اكله تاكلينها تأثر في الطفل، ولو عنده حساسية من اكله معينه انتي اكلتيها ورضعتيه راح تظهر عليه اعراض بعد ماترضعينه 👍🏻