رح اكتب بعض خطوات من تجربتي الشخصيه لما بدت عندي انقباضات الولاده الي هي الطلق الخفيف وان شاءالله تستفيدون معي .. اول شي بسم الله والصلاه والسلام على رسول الله اول شعور حسيت فيه كان مغص خفيف جدا لدرجه اني احسب انه مجرد برد دخل بطني او انه مغص من اكله اكلتها ولكن المغص مستمر يجي ويروح وخفيف جدا وبدا معه الم اسفل الظهر شعور غريب ماكنت عارفه ان هذا ممكن يكون بدايه الطلق حاولت اني ارتاح شوي حتى اشوف المغص بيروح ولا لا لكن للاسف كان الي كنت خايفه منه وهو بدايه طلق خفيفه واستمرت معي ساعات حاولت اني اكون هاديه وارتب بيتي شوي واكلت وشبعت وصرت امشي في البيت وانزل على الدرج واطلع سويت لي كوب قرفه وشربتها وهي دافيه بالاضافه الى البقدونس غسلت صره بقدونس وجلست اكلها لاني سمعت انها توسع الرحم اثناء الطلق وبعدت كل البعد عن المنظفات والمعطرات القويه الي ممكن لا سمح الله تسويلي التهابات او انها تسكر الرحم لما حسيت الطلق بدا يكون اقوى ومدته بدت تطول توجهت للمطبخ سويت لي ترمس اعشاب عشان اخذه معي للمستشفى لاني ان شاءالله احتاج شي دافي بعد الولاده وبحكم لاني لحالي واهلي بعيدين عني وبعد ما جهزت كل الاغراض الي باخذها معي للمستشفى واستعديت عشان باي وقت ممكن اطلع للمستشفى دخلت للحمام واخذت دوش بماء دافي وخليته يصب على ظهري وبطني وحاولت استرخي شوي واذا عندكم بانيو عبوه مويه دافيه واجلسي فيه كمان بيكون مريح وبعد ما طلعت من الحمام كنت قايله لزوجي يحمي لي شويه زيت زيتون على النار عشان يسويلي مساج لظهري وهالطريقه جدا مريحه يا بنات تخفف الالم بإذن الله ورجعت صرت ادور في البيت وادعي ربنا انو تكون ولادتي سهله ميسره وبهالوقت اشتد الطلق وخلاص صار موعد الروحه للمستشفى ولما رحت الحمدلله كان الرحم فاتح ٦ س وقعدت بعدها بكم ساعه من الام الطلق والمخاض ربي سهلها علي الحمدلله وولدت بنتي بصحه وسلامه وكان مجمل الطلق والولاده ٢٤ ساعه الحمدلله ما طولت اكثر هذي تجربتي مع الولاده ببنتي الثانيه وان شاءالله ناويه اكررها مع ولادتي الثالثه ان ربي يسر وانتم وش الاشياء الي سويتوها وحسيتو فرقت معكم وسهلت عليكم الولاده ؟