بنات انا زوجي طلقني غيابي بعد سنه زواج ومعايا طفله 6شهور ،طلقني لاني بعد سنه حرمان من اهلي طلبت اني اروح اشوف اهلي لاني عرفت أن امي مريضه جدا جدا اول ماروحت طلقني وكانت بنتي عندها شهر، انا راضيه بقضاء ربنا والحمد لله علي كل حال بس ندمانه جدا جدا علي تحملي كل الاهانه والضرب والشتائم طول السنه دي، ندمانه اني سكت علي كل حاجه غلط وعلي أنه عمره ماكان بيصرف عليا ،كنت حامل في الشهر التاسع وتلاجتي فاضيه ومش لاقيه حتي قطعه جبنه اكلها ،وكنت بكشف كل شهرين او تلاته ولو تعبت ممنوع اروح للدكتور حتي العلاج مكنش بيجيبه ،طول الحمل كانت اسناني تنزف من قله الكالسيوم وهو شايف ويقول عادي، ندمانه أشد الندم لانه طرد اهلي يوم ولادتي وسابني لوحدي وانا سكت لانه كان بيهددني اني لو روحت مع اهلي مش هشوف بنتي تخيلوا واحده والده ومتخيطه وقاعده لوحدها مش لاقيه اكل ومش قادرة تعمل لنفسها وهو جاي تاني يوم الولاده يقولي قومي اعملي اكل ونضفي الشقه .اتحرمت من اهلي كتير وكان ممنوع اهلي يدخلوا عليا طول السنه الي اتجوزتها .انا ندمانه علي كل حاجه حصلت في السنه دي والندم حقيقي هيموتني الاحساس ده صعب جدا جدا وهو من بعد ما طلقني وهو واهلي بيتكلموا عليا وعلي اهلي وبيتكلموا في عرضي وعرض أختي الصغيرة ،مش مهم انا بس كلامه علي اهلي وخصوصا امي واختي بيقهرني جدا وكل ما يتقدم شخص لخطبه اختي بيروح هو أهله للشخص ده ويقولوا كلام كتير مش كويس علي اختي وامي بالرغم أن اختي وامي عمرهم ماتدخلوا في حياتي ابدا ،انا اتظلمت ظلم شديد جدا منه ومن أهله ونفسيتي وحشه جدا كل مافتكر الظلم ادخل في اكتئاب شديد وخايفه ياخد مني بنتي، ياريت تقولوا علي حل انا مش عارفه اعمل ايه بحاول اعدي وانسي بس مش قادرة اسفه اني طولت بس مش عارفه احكي لمين وادعولي ربنا يعوضني انا وبنتي وينتقم من الظالم هو وأهله حسبي الله ونعم الوكيل