كيفكم يا أمهات ان شاء الله تمام بدي احكي تجربتي مع زيت الخروع ، انا بصراحة بحثت كثير عن الموضوع واستفسرت وتوكلت على الله وشربته ، كان يوم عادي زي اي يوم بس كان فايت موعد ولادتي المقرر يومين يعني المفروض اولد ب 1.2.2021 قلت خليني اصبر شوية وبعدين بولد باذن الله المهم كنت بشرب قهوتي الصبح وبتحرك بشغل البيت عشان يصير طلق وما منه فايده غسلت سجاد ورفعت وما فادني اي اشي ، كل هالحكي كان ب 2.2.2021 ,يا بنات صارت الدنيا عصر ولا اشي معي ولا وجع ولا حركة للجنين 🙁رحت بحثت بچوچل عن محفزات الطلق وهالقصص وبحثت بالتطبيق هاد وطلعت بنات كتير مستعملين وفي نسبة نجاح ، صليت وتوكلت على الله وحطيت ربع كاس زيت خروع (ثلاث ملاعق صغير زيت خروع ) وتقريبا 1/2 كاس عصير برتقال وشربتهن على الساعه 4 العصر بصراحة ما اجاني وجع الا مغص خفيففف جدااً على الساعه 6 ورحت المستشفى وعلمت فحوصات وماكان في غير فتحة ونص وحكتلي الدكتورة روحي عالبيت ما في فتحات معك وانا وقتها عل 8 حسيت بالم شديد واسهال ومغص أكرمكم الله ما تحملت صار يجيني وجع كل 10 دقايق حكيت للدكتورة وما صدقتني واصرت انه اروح عالبيت وارحع عليها بعد اسبوع ، وانا روحت بعد ساعه وصلت وتحممت بمي ساخنه وهكذا … بعد ساعتين ونص زاد الوجع اكتر وصار كل 5-4 دقايق يجيني خفتت وكانت الساعه تقريباً 12 منتصف ليل بسرعه غيرت ورحت عالمستشفى وحكتلي الممرضة انتي روحتي ليش رجعتي قلت مش قادره اتحمل عملت فحص لاقت في 8 فتحات دخلتني بسرعه غرفه الولادة وانا الوجع زادد اكترر كل دقيقه لحد ما طقت ميه الرأس وصارت الساعه 1 وولدت وانا بقرأ ادعية ما كان عندي حدا الحمدلله حسيتها تجربة رائعة وانا يا بنات انصحكم بالاستخارة قبل استخدام زيت الخروع انا خفت يصير مضاعفات بس الحمدلله من قوه الايمان وكثر الادعية والحوقلة ربنا يسر الامور معاي ♥️♥️♥️♥️♥️♥️