قبل ما نهدرلك على كيفاش تتهلاي في الخياطة تاعك نقوللك علاه نقطعوك ! ⚫ شفتي فتحة المهبل شحال ضيقة، طولها و عرضها ما يفوتوش ربع الإصبع ، تخيلي يخرج منها بيبي يوزن كيما الحبة تاع الدلاع و لا أكثر . صح البيبي راح يوسع اللحم هذاك باش يفوت بصح الإتساع هذا عندو حدود ، و يقدر الرأس تاعو يقطعك بأشكال عشوائية ، صعيبة باش تتخيط و تطول باش تبرا و مرات تدير حتى تشوهات . المشكل لكبير كي تتقطعي من المهبل و تزيد تتقطع فتحة الشرج معاه ، سيدتي في هاذ الحالة تعرفي واش يصرالك ؟ الوسخ ( كاكا) يروح من المخرج الى الرحم، و الرحم تاعك يتعفن ، و تولي عندك أنفكسيون ، و في بعض الحالات المتقدمة تلحق حتى لإستئصال الرحم نهائيا باش نتخلصو من الأنفكسيون . ⚫باش ما يصراش هاذ الشي نفضلو حنا نقطعوكم ، و نكبرو فتحة المهبل ، باش نقدرو نخرجو البيبي، هكا نتحكمو في التقطاع هذاك و نخيطوه عادي .. يعني ماشي بلعاني و لا زكارة فيكم، بالعكس أنا كقابلة مذابيا ما نقطع ما نخيط ما نزيد تعب لروحي. ⚫هاذ العملية ما نقدروش نعرفو بلي رايحة تصرالك حتى في لحظة الولادة كي نشوفو راس البيبي ماشي قادر يخرج و لا لحمك رايح يتقطع وحدو .. ⚫ ماهيش تلقائية عند كل ولادة، لكن عموما تندار بزاف في أول ولادة، لأنو اللحم تاعك يكون مزال ما جربش الولادة، اومبعد يوالف، لحاجة لمليحة هي انو اذا تقطعتي المرة الثانية ما تنضريش كيما المرة الأولى، دايمن نعاودو نقطعوك في نفس البلاصة و يبدا هذاك اللحم ينقصلو الإحساس. ⚫كل ما تكوني والدة بزاف كل ما تقل نسبة نقطعوك .. بصح هاذا راجع تاني للوزن تاع البيبي و الوضعية تاعو و اذا ماكانوش توام و تاني اذا ما كانتش عندك انفكسيون خمجتلك اللحم تاعك و رجع يتفتت وحدو ( على جال هكا لازم تداوي لانفكسيون تاعك قبل الولادة) .. ⚫نورمالمون قبل ما تتقطعي و تتخيطي يديرولك تخدير موضعي، و تقدري تشريه و تديه معاك لسبيطار اذا خفتي مايكونش كاين . مع العلم كاين لي يفضلو ما يستعملوهش على خاطر ينفخ اللحم اومبعد يتفش، سما الخياطة تخرج معوجة. ⚫الخيط لي تتخيطي بيه يذوب و يتنحا وحدو في 10-15 يوم، اذا تجاوزتي المدة روحي للقابلة تنحيهولك . 🔵 صحا نروحو للنصائح : - كي تكوني تزحمي تبعي واش تقلك القابلة، وقت التنفس اتنفسي، وقت الزحمة أزحمي. - أولا كي يكونو يخيطو فيك افتحي رجليك مليح سيدتي، باش يخيطوك مسقم، و ديري فبالك لخياطة كي تتعوج تبقا توجعك حياتك قاع خاصة كي تجامعي . - في الأيام الأولى أغسلي الخياطة تاعك بنص قرعة بيتادين مخلطة في لتر ماء، مرتين في اليوم .. استعملي صابون خاص بالمنطقة هاذيك و من الأحسن يكون بدون روائح أو ملونات مثل lactamous. و ما تكثريش منو و تقدري تدوشي عادي . - دايمن دايمن بعدما تغسلي نشفي تحتك، و ما تحكيش، امسحي كيما يمسحو الڨاوريات وجههم 😁😁 و ما تستعمليش سيشوار باسكو يذوب لخيط و يخسرو . - الفوطة تاعك ( la serviette hygiénique ) بدليها كل زوج سوايع . و بعدي على قاع المواد الكميائية. - تقدري تستعملي بومادة تاع les cicatrices. كيما تقدري بعد ما يتنحا الخيط تديري ماساج لروحك بالزيوت ، و كي يتزير عليك الخيط دفي زيت زيتون و ديريها عليه . - كي يزيد عليك السطر اقعدي على لابووي باش تخففي الثقل على لخيط ، و ديري حاجة باردة فوق لخياطة .. تقدري تشربي باراسيتامول تاني . و ما تفورصيش على روحك فالشغل ، خاصة كي ترفدي حاجات من الأرض . - تجنبي قاع الأكل لي ييبس الكرش constipation - ما تلبسيش slip يتوشي الخياطة، يا يكون طالع حتى لفوق يا يكون بيكيني، شوفي انت واش يوالمك . و مرات مليح ما تلبسي والو و تخليها تتهوا . - الجماع يا سيدتي يكون ممنوع عليك، سينون تنفتح لخياطة و تولي في حكاية وحدوخرة. خلي حتى يفوتو الربعين تاعك و تكوني بريتي و استحفظي على روحك حتى مور ما يتنحا الخيط. 🔴 اذا شفتي عندك قيح ، و لا دم يسيل من الخيط، و لا وليتي زرقة ، و لا رائحة كريهة ، و لا أي مادة ملونة خرجتلك ، و لا تنفختلك لخياطة ، و لا تنحالك لخيط و الجرح مابراش ،أرفدي روحك و أجري للقابلة و لا جينيكولوڨ تشوفك .منقووولللاستفادة