السلام عليكم ورحمة الله وبركاته .. اخواتي الموجودات بالبرنامج حابه اكتب لكم تجربتي مع الولاده حتى اعطيكم امل وحافز وان شاء الله يبعد عنكم الخوف والقلق للولاده .. انا من حوامل نوفمبر وبالتحديد ٣٢ اسبوع بالشهر الثامن من حملت وانا مارتحت بسبب عندي طفلين على طول وراهم واراعيهم ايام وحامي كانت صعبه ماخلصت الا بالخامس وبرمضان تعب الصوم والطبخ ودوام طفلي وبعد عيد رمضان بديت ادخل الاشهر الاخيره والثقل يزيد والتعب يزيد اكثر ورجع عليا الوحام ومرضت بالانفلونزا تعبتني مره ماكنت قادره استخدم علاجات .. المهم صباح ثاني يوم عيد الاضحى كنت جالسه وافطرت وماكان فيني شيء غير تعب بسيط بعد تنظيف البيت وكنت احس فخذي شاد مره بالموت امشي واتحرك .. ونمت على الساعه ٧ توني غفيت الا حسيت اني جالسه ابلل نفسي وانا منسدحه وقمت فزيت بسرعه وجري على الحمام الا لقيت المويه منفكه وتنزل بقوه دفعه وحده .. احترت مدري وش اسوي وانا بالشهر الثامن كيف بولد الحين وماعندي مشاكل بالحمل ومره خفت وظليت ادور بالبيت مدري وش اسوي ولا جاني الم طلق ولا شيء .. بعدها صحيت زوجي وقلت له قوم ودني المستشفى وارجع بسرعه للعيال خل اشوف ايش السالفه ورحنا بسرعه للطوارئ قالو تنويم لازم طالما المويه مستمره تنزل وعطوني ابره رئه جرعه وحده المفروض جرعتين بس مالحقت للثانيه وجلست تحت الملاحظه من الساعه ٨ ونص الين وقت صلاة الظهر وانا ادعي الله يشتد طلقي وجلست اقرأ قرآن والحمد لله التخطيط كل ماله ويشد كنت خايفه اتعسر واتأخر بالولاده لكن الحمد لله تسهلت ومع اذان الظهر دعيت الله يخلصني بأسرع وقت والحمد لله زاد الطلق وجات الدكتوره تكشف كم فاتح وشكلها سوت حركه خلته يسرع يفتح لانها المتني مره ودوني غرفة الولاده والحمد لله ربع ساعه وولدت وطلع طفلي للحياه حجمه مره صغير ١٩٠٠ .. وحطوه بالعنايه الحمد لله على كل حال وانتهت رحلة وهن على وهن ويارب تشفي صغيري وافرح فيه بحضني دعواتكم له حبيت اكتب لكم تجربتي لاني من ساعة اللي حملت خايفه من هاليوم لكن الحمد لله تسهل ومر كأنه حلم وماحتجت قص عجان لان حجمه صغير واستودعكم الله ويارب تقومون بالسلامه وتفرحون بولاداتكم ❤️❤️❤️