السلام عليكم و رحمة الله و بركاته انا من حوامل 28 فبراير و الحمدلله ولدت باخر يوم لي بالتاسع طبعًا من اول مقرره اولد بمستشفى اليمامة ف مهما كانت تجربتي نويت اشاركها مع الكل بما اني كنت متخوفة من الانتقادات و الذم الي مافي غيرهم حرفيًا مافي مدح المهم نزلت علي موية الجنين الساعه 12 و نص اخر الليل و رحت المستشفى على طول و دخلوني الطوارئ و كانت مناوبة الدكاترة الرجال الدكتورات النساء ما يجون الا من 7 الصباح بس الحمدلله اصريت شوي و دخلت لي ممرضة و كشفت علي و كان فاتح 2 و بعدين جلست بالانتظار حق الطوارئ لين تفضى احد الغرف و يدخلوني يحطوا لي جهاز التخطيط و الحمدلله عالفجر كان فاتح 4 تقريبًا و الممرضات بالطوارئ كلهم فليبينيات عسل مررره مره و يساعدون و يهتمون و كلامهم حلو ما عدا وحده شوي ما حبيتها بس الحمدلله كانت عند الاستقبال😅 المهم طلعوني غرفة الولاده و كانوا مررره مهتمين و الغرفه نظيفة و الحمام و كل شي و عندي ممرضة جالسه طوووول الوقت بزاوية الغرفه و حتى مغطين علي بستاره و الساعة 10 تقريبًا ولدت و لله الحمد و كانت الدكتورة و الممرضات كلهم سعوديات و طيبات مررره و عسل و يهتمون و كلامهم حلو مررره مره و يشجع و حطوا لي طفلي عالدفاية جنبي اشوفه بعدها طلعوا بقت معي الممرضة الي من اول موجودة نظفت الغرفه و رتبتها و اي شي اطلبها تعطيني كانت تدفيني و تهتم فيني مرره تجنن تمنيت عرفت اسمها😔 و بعدين خذت ملابس طفلي و لبسته و سألتني عن اسمه و تلعبه و تمزح معاي و تسولف و بعد ساعه او ساعتين فضت احدى الغرف بالتنويم و طلعوني هناك و فقد الاهتمام الي عند الولاده شوي😅 بس ما يهم كنت بخير و طفلي معي و عطوني اكل و الزياره كانت 3 العصر و طلعت مع زوجي على مسؤوليتي و اليوم الثاني ودينا الطفل سوو له فحوصات شاااامله و كل شي بخير ياربي لك الحمد. بس والله هذي كانت تجربتي مع المستشفى الي سمعت عنه كل مساوئ الدنيا و طلع عكس ذلك تمامًاااااا🤍