اللهم لك الحمد انتهيت من اول مرحله بالحمل الى المرحله الثانيه بالثلاث الشهور الوسطى اخر دوره كانت 24/2/2026 لكن الحمل صار في مارس بسبب الاباضه المتاخره اتمنى تكون المرحله الثانيه اسهل من المرحله الاولى لان مريت في صعوبات وتعب الله يعلم فيه من مستشفيات وتنويم ومشاكل الحمد لله عدت ويارب خير في الاشهر الجايه . الشهر الرابع : المده: اربع اسابيع ( من الاسبوع الخامس عشر الى الاسبوع الثامن عشر ). الاسبوع الخامس عشر : اليوم الثاني : كان عندي موعد سويت سونار تفصيلي سمك الرقبه ومن هالاشياء واللهم لك الحمد والشكر الامور طيبه وصرفت لي دواء حديد فقط وطلبت مني احجز موعد بعد خمس اسابيع ان شاء الله . اليوم السادس: معي كثره تبول ولازال موضوع الروايح تخليني استفرغ لكن الشهيه رجعت لي وصرت اتقبل الاكل اللهم لك الحمد عقبال الروايح . الاسبوع السادس عشر: اليوم الثاني : معي الم ظهر ومعي ارق مانام الا متاخر واذا نمت كل شوي اصحى ومعدتي تفضى عالطول تجبرني اكل ولا بستفرغ خصوصا وقت النوم . اليوم الخامس ؛ معي حموضه بالحلق تخليني استفرغ وخفقان القلب احس بيغمى علي لو اتحرك والم ظهر وسيقان . اليوم السابع: رجع لي غثيان الصباح اذا ماكليت عالطول استفرغ وزادت حاسه الشم عندي وقاعده استفرغ من الريحه ومعي حررقان وثقل بالبطن . الاسبوع السابع عشر : اليوم الخامس : معي تنميل بيديني ورجليني خفت من قلة الحركه صرت كل شوي امشي شوي . الاسبوع الثامن عشر: اليوم الاول: حجزت موعد بتاريخ 18/7 وان شاء الله خير يارب . اليوم الثاني : معي ثقل في بطني من فوق تحت الصدر منتفخ وثقيل ماقدر اتنفس منه مع ان الجنين موقعه تحت تحت بالاسفل ماني عارفه وشو هذا الشي الي كاتم ع نفسي ومعي ارق ماعرف انام ابد ومعي الم ظهر . الشهر الخامس : المده : ( اربع اسابيع ) من الاسبوع التاسع عشر الى الاسبوع الاثنين والعشرين . الاسبوع التاسع عشر: اليوم الاول : اليوم جاني تعب مو طبيعي رحت الطوارئ جاني تنميل بيديني ورجليني ووجهي والم ببطني وظهري وهبوط وكل شي صار يعورني سويت سونار والحمد لله الامور طيبه بس قالت حجم بطني صغير واحتمال كبير ولادتي قيصري كل شي منكمش عندي الجنين والمشيمه وسويت تحليل دم الحمد لله تمام سويت تحليل بول وطلع معي التهاب بول شديد احتاج مزرعه بول اخذو مني عينه وطلبو ارجع لهم بتاريخ ٩ يوليو يارب خير وعطوني مغذي يمنع الاستفراغ لاني استفرغ ونفس الوقت مغذي يحمي المعده لان جاني مع الحمل قولون منتفخ بطني من فوق بشكل لدرجة ماقدر انام من الضيق والكتمه وصرفو لي مضاد اخذه لين موعدي وصرفو لي كالسيوم واوميغا ٣ لان سبب التنميل نقص فيتامينات وطلبو مني اشرب مويه كثير خايفه متوتره وكل شي الله يعين . اليوم الرابع : معي ثقل مو طبيعي مدري ليه يصير معي كذا ، وعندي موعد بكره علشان مزرعه البول يارب تبشرني بالخير فانت خير المبشرين. اليوم الخامس : اليوم كان موعدي اللهم لك الحمد والشكر طلعت النتيجة سليمه لمزرعه البول لكن طلع معي قولون يجي وقت الحمل مزعج جدا صرفت لي دواء للمعده يساعد ان الانتفاخ يخف شوي ، واللهم لك الحمد والشكر عرفت جنس الجنين مثل الي اتمنى بنوته بنوته بنوته اللهم لك الحمد والشكر الله يبلغني واشوفها بصحتها وعافيتها بحضني يارب ، وطلبو مني احجز موعد بعد اربع اسابيع يارب خير ان شاء الله . الاسبوع العشرين : اليوم الخامس :ريحة البيت مو قادره اتقبلها لين الحين طول موضوع الروائح معاي . اليوم السادس: معي حكه مو طبيعيه اليوم بخشمي وبجسمي وبشعري حسيت فيني قمل من كثر ماحكيت ماعرفت انام من الحكه. الاسبوع الواحد والعشرين : اليوم السابع : جاني الم مو طبيعي في بطني وظهري ، الم البطن كان عباره كانه الم دوره والم الي تعورني معدتي من الاكل الي ودي استفرغ ع ابي الحمام كان شعور غريب ، وجاني الم خفيف بسيقاني ورجولي .