انا حامل بالشهر التاسع ومتابعة عند دكتورة وكل المواعيد اروح لها واموري تمام لحتى وصلت الشهر الثامن رحت الدكتورة كنت تعبانة جدا عملتلي تحاليل السكر وقياس الضغط طلع عندي الضغط عالي واعطتني دوا ماشية عليه السكر كان مرتفع ارسلتني لعند دكتور تبع سكر عملي تحليل تراكمي طلع 6,1 خبروني ان مافي عندي سكر واعطوني حمية رجعت لعند الدكتورة النسائية شافت التحاليل وقالت امشي ع الحمية وضعك تمام الموضوع مايخوف مافيش عندك سكر كان وزني يزيد كل اسبوع ٣ كيلو تقلي من الضغط زيدي حبة صرت اخد حبتين الدوميت الصبح وحبتين الدوميت المسا وكنت تعبانة جدا مااقدر اتحرك رحت لعندها اول الشه التاسع شافت النبض وعملت تصوير دوبلر ع اساس تطمن ع الوضع قالوا كويس لكن راس الجنين لسا فوق قلنا معنا وقت ان شاء الله بيلف واعطتني موعد بعد اسبوع انا بغد يومين من كتر التعب رجعت لعندها قلتلا تعبانة والبيبي مابحس بحركاته قاست النبض قالت كويس اعطتني موعد بعد اسبوع قالت مارح تحسي بالحركة لأن راسه فوق انا ع كلامها سكتت وبعمل اللي تقلي عليه رجعت لعندها بعد اسبوع تقيس النبض وتعمل تصوير قالت مافي نبض .. الجنين مات😭 ارسلتني ع دكتور يعمل تصوير دوبلر قال نفس الشي الجنين ميت قريب بعدها بيوم رحت لدكتورة غيرها حكيتلا القصة صورت قالت ميت شافت التنفيخ برجولي الله يكرمكم قالت كتير الضغط شافت التحاليل قالت يابنتي عندك سكر قلتلها انا كنت متابعة مع الدكتورة الاولى والدكتور تبع السكر ماحدا قالي عندك سكر قالوا وضعك تمام وامشي ع الحمية عملتلي جدول اسجل فيه النتائج ارسلتلا الجدول قالت عظدك سكر مرتفع وصفتلي دوا وقالت لي الضغط مايموت الجنين .. الجنين مات من السكر . انا هنا الدنيا لفت فيني صرت ابحث عن سبب موت الجنين.. ضغط ولا سكر ولا اهمال انا كنت اروح اخبر الدكتورة الاولى بكل شي يصير معي حنى يوم رحت لها وانا ببكي بقلها مابحس حركة تقلي خضيتيني الله يصلحك وتقلي الوضع تمام طيب مو المفروض تهتم في موضوع السكر؟؟؟ مو المفروض تهتم لكلامي لما اروح لها تعبانة؟؟ مو المفروض تقلي بعد يومين؟؟ ولسا باقي الجنين في بطني ماولدت طيب ادامي لسا مشوار ولادة وعندي سكر وضغط وتقلي تعي بعد اسبوع عادي تستنى يجيكي الطلق الان انا لسا الجنين في بطني وماعارفة وين اروح لعند الدكتورة الثانية ( هي ماشاء الله دكتورة شطورة وفاهمة بشغلها بس عصبية ) او الاولى ( طويلة بااااال بس الطف من الثانية ) خايفة ومحتارة وماعارفة وين اروح كتبت الموضوع من اجل تستفيدوا من تجربتي او اذا وحدة مرت بظروف متل ظروفي لأني مافهمت الامور لحتى عدت عليا بعد اسبوعين .. وكانت نهاية الحمل ان ولدت بعد اسبوعين من موت الجنين بولادة طبيعية لطفل ميت مقعدي نزلوا رجوله وبعدين راسو بأمر من الله الحمد لله على كل حال والله يجعله لنا شفيع حسبنا الله ونعم الوكيل وانا لله وانا اليه راجعون