بكتب قصة ولادتي حتى تنحفظ ذكرى وبنفس الوقت افيد اي بنت بكرية مثلي اولاً انا من حوامل نوفمبر اخر دوره بتاريخ ٧/١١ ولدت في الاسبوع ٣٩ وخمس ايام حرفياً كان باقي يومين وادخل العاشر من اول مادخلت التاسع وانا ما خليت شي ماسويته من مشي رياضة القرفصاء ( سكوات ) تمر واناناس ، ينسون ، كمون ، حليب مع قرفة او زعفران ، شاي التوت البري ، جماع .. بس ما كان في اي بوادر غير الطلق الكاذب ( براكستون هيكس ) كان يجي ساعتين مثل الم الدوره و يختفي ، لحد ماوصلت ليوم ولادتي الي هو بالاسبوع ٣٩ و ٥ ايام كنت اكلم اختي بالتلفون و اشكيلها اني مليت وماخليت شي ماجربته. ف قالت بقى بس زيت الخروع ماشربتي وكانت تضحك ف قلت خلاص بشربه الحين هههههه. توكلت على الله وشربت ملعقتين مع كاس عصير تفاح شربته الساعه ٨ بليل وبعد ساعتين ١٠ بدء عندي اسهال وانتوا بكرامه. بطني فضت على الاخر بس ما كان في الم فقط شعور بالغثيان من طعم الزيت لما صارت الساعه ١٢ ونص كنت نايمه عادي و فجأه جاني الم قوي يختلف عن كل مره. ومنتظم كان كل ٥ دقايق يجي ٣٠ ثانيه و يذبحني ذبح. مو مثل الم الدوره انما شي بحياتي ماشفته. كانوا ال ٣٠ ثانيه مثل ٣٠ سنه المهم قمت من فرشي ابي اتصل على المستشفى و اول ماقمت نزل ماي الجنين. وهنا على طول اخذت دوش و جهزت اغراضي و ركضت للمستشفى طبعاً البكريه مثلي تسأل نفسها شلون افرق ماي الجنين عن البول وانتوا بكرامه. بتفرقين لان له ريحه مميزه و ينزل معاه خيوط دم و لما ينزل دفعه وحده ماتقدرين تتحكمين فيه مثل البول. لما وصلت المستشفى ساعه ١ بليل كان الالم يقرب اكثر صار كل دقيقتين لما يجيني مااعرف اتكلم ولا اشوف احد كنت بس ابكي ابي احد يساعدني ف اجت الممرضه وفحصتني لقت التوسع ٥ سم فقالت الحين انتي بنص الطريق بعد ٥ ، قلت مستحيل اذا هذا الالم ونص الطريق مااقدر اتحمل اكثر. وطلبت ابرة الظهر بالحاح بعد ساعه ونص اجه دكتور التخدير ب ٢ ونص. وعطاني ابرة الظهر بدء مفعولها بعد ٢٠ دقيقه نصيحه يا بنات اخذوا ابرة الظهر. لانها نعمه كبيره من رب العالمين صدقوني حسيت براحه مو طبيعيه وبنعاس وعلى طول خدرت ونمت. وعلى فكره كان عندي احساس برجولي احركهم عادي. المهم وبعد النومه الطويله ساعه ٥ ونص الفجر صحتني الدكتوره عشان تشوف التوسع. وطلع ١٠ سم الحمدلله وقالت يلا صحصحي بعد ساعه راح نبدي بالدفع لان البيبي صار جاهز. وصدمتني لما قالت ان ابرة الظهر بيروح مفعولها مع الدفع لان قوة الالم اكبر من مفعول الابديورال المهم انا بديت ادعيه و اخفف على نفسي و اشجعها بعد ساعه جت الممرضه وبلشنا الدفع الطريقه كانت اخذ نفس قوي مع كل طلقه تجيني واكتمه داخلي وادفع كأني ابي اتبرز وانتوا بكرامه ولما يروح الطلق كنت اخذ بريك وارتاح مااوصفلكم الالم. مابي اخوف احد بس صدقوني بمجرد مايطلع البيبي بتنسون كل شي شعور مو طبيعي لما بنتي طلعت وحطوها على صدري هنا توقف الالم تماماً وقطعت اتصال مع الجميع هههه كنت اطالعها وبس وابكي من فرحتي الله يرزق هالشعور للجميع يارب وجت بنوتي يوم ١٢/٨/٢٠٢١ الف الحمدلله والشكر واي بنت تبي تجرب الاشياء الي جربتها. لاتخاف اهم شي تتوكل على الله قبل كل شي و اي سؤال انا حاضرة خصوصاً للبكريات مثلي. وهذه الصوره للي تبي تكتب اسم البيبي 🌹❤️