بغزة، الجوع ماشي عبيوت الناس زي شبح، وريحة الموت فايحة بكل زاوية، مختلطة بريحة الدخان اللي طالع من بيوت كانت مليانة حياة. الحرب هناك مش بس قصف وهدم، لأ، هي خنق بطيء، وجع بقطع النفس، إشي فوق ما أي كلمة بتقدر توصفه. الولاد هناك ما عرفوا طعم الطفولة، كل لقمة بتنحسب معجزة، وكل يوم بمر عليهم هو معركة عشان يضلوا عايشين. أمهاتهم قلوبهم بتنحرق على ولادهم اللي بدبلوا قدام عينيهم، وعجز آباءهم عن إنهم يوفروا لقمة الخبز بحفر بقلوبهم جروح ما بتنمسح. غزة اليوم مش بس منطقة محاصرة، هي صرخة إنسانية قوية بوش صمت العالم. هي قصة شعب عم بنقتل شوي شوي، والحياة بتنسحب منهم بالقوة، ومحرومين من أبسط حقوقهم إنهم يعيشوا بكرامة. متى بدها توقف هالمأساة؟ متى بدها ترجع لغزة نبضها، وتوقف هالدوامة من الألم والجوع والموت؟ هاي أسئلة أكبر من الزمان والمكان، وبتدق على أبواب ضمائرنا، عشان تذكرنا إنه الإنسانية عم تنحط على المحك هناك، وإنه الصمت مش خيار. #إدعو #لغزه ما تنسوهم