لك صار عمري 28 وبعدني بالبيت .. والقطار عمايمر قدام عيوني وعم يقلي باي بااااي .😒 وانا بعدني عم اتزحلط عالسكة 😑 قاعدة عم انكبس عند أهلي مخلل .. ياربي كل يلي بعمري صاروا متزوجات وعندون أولاد.. إلا أنا 😢 أيمت بدي استقل بِ بيت لحالي .. ما اسمع صريخ أمي (( يبلاكي بقتلك صارت 11 قومي اشتغلي)) أيمت بدي افتح فيس وواتس وما اسمع سينفونية أبي (( شيلي هالضرابة من ايدك يلي شايلتيه 24 ساعة )) أيمت بدي نام ببيت جوزي واتفرفد عالتخت .. وما اسمع صوت ولاد أخي هابوب ودابوب (( على عمتو طعميني .. وعمتو شخخيني)) هلق عنجد !!! فكروا فيني !!! حسوا فيني !!! صرنا أزمة أكبر من الأزمة يلي بالبلد ماعاد ضل في شباب .. 70 بالمية صار بين لاجئ أو مهاجر أو محارب أو مفقود ولَابْلابْلابلاه 🤐 صفنت بحالي وحملت ع ضهري كيس المبررات وقلت لايمت رح ضل هيك ؟من حقي أتزوج .. واحمل .. ويصير عندي ولاد متلي متل غيري😊 بدي دوّر على عريس .. ماصحلي عزّابي .. باخد متزوج 🤔ليش شبو المتزوج بالعكس بكون واعي وعايك بهالحياة مو طنط متل شباب هالجيل يلي على راسو واكس ..وبنطلونو زاحل لركابو والبوكسر عما ينادي ويزلغط تعا شوفو ألواني 😁 اول شي بلشت اعمل بحث شامل لأفراد البناية. لحتى طلع معي الجار مصطفى يلي بالطابق الاول احلا وأصغر واحد😍 صح متزوج وعندو بنتين وصبي. ومرتو كتير منيحة. بس عادي تكون ضرتي ماعندي مشكلة 🤗 صرت كل يوم اتعطر والبس أحلى ما عندي .. واربطها مع طلعتو على شغلو. لحتى طبقتو بتلات حركات و علقتو فيني😎😍 مرتو عرفت بعلاقتنا تخانقت معو وصوتون عبّا البناية.. أخدت ولادها ياحرام وضبت غراضها وحردت وطلبت الطلاق😁 (( ومع السلامة يا حمامة )) منيح هيك عملت .. فضتلي الساحة وصار هيك مافي حجة ليرفضوا أهلي عرض الزواج منو 😍 وبالفعل اجا خطبتني من أهلي ووافقوا بس كان شرطي يكون عرسي بصالة أفراح 😎 كان حلمي ألبس الأبيض 👰 وقلّد مقاطع الفيديو للعرسان يلي كتير دارجة عالنت .. حمام يطيروه عالعروس ... والكرسي والاركيلة يلي بحطوه بنص البيست والعروس تتمختر وترقص وتغني حواليه😍 بدي جاكر رفقاتي وكل وحدة قالت : ياحرام عنستي 😁 مرت الأيام وصار يوم العرس وفتنا عالصالة انا وياه 👰👨💑 مو معقول شو كانت رايقة هالحفلة من البداية 😌 فجأة !!!!؟؟؟ الأضواء يلي بالصالة بتنطفى وبيطلع صوت موسيقة متل وقت يفوت جون سينا عالحلبة 😅.. بعدين بتبلش الأضواء الخافتة تقوى وتوضح الرؤية .. فتحنا عيونا انا وجوزي طلعلنا أربع نسوان لابسين عبايات☻☻☻☻ انا فورا"جهزت وضعية المدافع وشلحت كندرتي أم كعب 👠 بعدين هالنسوان الأربعة بعدوا وبتجي من وراهون صبية بتجنن .. مكياجها سحر ... شعراتها خيال .. طلتها ملكة .. فستانها ملفت عما يلمع لمع .. العمش والله هي مرتو 😱؟؟؟!!! جوزي انبهر .. انفلج بس شافا وشاف جمالها .. أول شي خفنا تكون ناوية على شي .. بس هي بالعكس ابدا" ما التكشتنا. وقعدت على الطاولة . وصار جمالها حديث نسوان الصالة وتركوني😢 طلبت من الكنترول يحطولي غنية يا مصطفى يا مصطفى انا بحبك يا مصطفى عشان ارقصلو واتدلعلو وطير الحمام وطقق ضرتي 😁 طلعت الأغنية وانا نطيت عالبست بلشت أتمايل واتخلوع عالغنية وجاكر ضرتي🤗 وطيّرو الحمامات البيضة بالجو الولعان بالصالة 🤗 انا كنت مفكرة رح يطيروا متل مابشوف عاليوتيوب .. لك طلع العكس يبلاهون بقتلون هالحمامات قلبوا جحاش وصاروا يخبطو ببعض حسيت حالي بأسطوح البناية بين الكشّة مع الحميماتية. لاء وشو ؟؟ في حمامة قعدت عراسي وبطلت تقوم فكرت شعري عش حمام .. قعدت كشها من ع راسي وصرخ لحتى انفكت مني وشخت علي😭😭 كلو صار يضحك ولك بزمتي حتى الحمامات حسيتون عما يضحكو 😭😭 انا مشان غير الموضوع . وأحفظ ماء وجهي. فورا" طلبت من الكونترول يجهز الاركيلة والفحمات وحطلو كرسي بنص البيست واغنيلو وارقصلو 😍 وبالفعل حطيت أغاني أليسا وهوي قعد يأركل بالنص .. وأنا اتفتل حوليه بالأغاني والرقص والدلع .. حسيت رفقاتي وضرتي يا حرام رح يهستروا غيرة وحسد😁 ((هنن يغاروا)) وانا ارقص وفوت بالجو اكتر واكتر😍 ((هنن يطقوا)) وانا افتح ايديي وافتل متل الفراشة 😍 ((هنن يفقعوا))وانا زيد حركة الدوران والفستان يطير اكتر 😍 من شدة هيجاني ودوراني وحركاتي اللولبية .. حسيت كعب الكندرة طق ورحت قاعدة قعود على منقل الفحمات😖😭 يا أمي الوجع .. دخيل الله كبولي مي باردة عالسريع احترقت البطارية😭 الكل صار يضحك علي .. ويتمسخر عليي .لك حتى العريس فرط كبدو ووقع على ضهرو من الضحك . قلبت قد الصوص بالصالة شلفت بوكيه الورد على خلقتو وقلتلو يلعن ابوك وانسحبت تكتيكيا" كرمال يلحقني قدام الكل ويتعزرلي 😓 خربت الحفلة .. اكيد عين مرتو طرقتني😔 إدارة الصالة نادت عالمايكروفون وحكت للعريس شو نلغي الحفل ولا نكفي🎤🎤 شفت العريس بعيني يلي عما تراقبو ..وقال: لا العرس رح يكفي مارح ألغيه.. وهمس بإذن المضيفة مشان تحط أغنية وتعطيه المايكروفون يلقي كلمة😍 يسعدلي الله يلي خلقو كيف بيزبط كلشي بحكمتو وفهمنتو😍صرت زبط فستاني وشعراتي مشان يجي يراضيني😍 مسك المايك بإيدوا مع ابتسامة وقال : 🎤 (( انا بعتذر عن كلشي صار بالصالة. وأنا رح ارجع كفي الحفلة من أول وجديد .. بس ماعاد بدي التقليد .. بدي ارجع للأصل .. بدي أرجع للدهب العتيق .. بدي ارجع لأم ولادي .. بتمنى تسامحني 😔)) وراح لعندا سحبا من ايدها .. واخدها عالبيست .. ولفا على خصرو.. وغمز الكونترول ورقصوا على غنية للمرحوم ملحم بركات (( مرتي حلوة متل البدر يا سبحان ال خالقها .. وحلفتلها بليلة القدر مابخونها ولا بطلقها )) 😭😭😭😭😭 بقلمي.الهندي😁.. سمعتي_اختي_الكريمة_مرتوحلوة_مارح_يطلقها اختي_الكريمة_المتزوج_اتركيه_اعتقيه_انسيه_احظريه_ليش_تركتي_امة_الله_ولحقتيه_ بيت_المتزوج_لا_تخربيه سعادتك_على_تعاسة_غيرك_لا_تبنيه نصيبك_رح_تاخديه_ولاتلعبي _فيه