«بين نارين» بقلم: مروةآغا @rwayate لجزء_الأول (1) : أنا مستحيل أبقى معو مستحيل لك هاد عامل عدة حسابات ع الفيس مشان شغلات عاطلة كيف بدك أبقى مع هيك واحد .. لك متخيلة معي كيف كنت جدبة .. كل الأيام كان عم يضحك عليي !! مرام: والله أنا معك ياغزل بس ما هيك القصة لازم تطولي بالك إفهمي منو ولازم تعرفي ليش هيك عم يعمل غزل: أختي يعني صار الحق عليي لك بتعرفيني ما مقصرة معو شي مرام: حبيبتي والله ما قصدي شي .. أنتي بتفكري إنك ما مقصرة بس الرجال تفكيرن بالإهتمام غير تفكيرك .. لازم تسمعيه تفهمي وجهة نظرو .. ليكيه واقف تحت بيتنا من الصبح الله يرضى عليكي وكرمال ولادك غزل: أف منكن أف أنا ليش دائما بسكت إلا كرمال هالولاد بس هلق خلص ماعاد ينفع معي شي قلبي قسي وصار متل الحجر مرام: يا غزل لك شوفي شكلك شوفي حالك كيف صايرة عصبية وما بتتحكي والرجال ما دائما بيصبر لازم بيتو يكون راحتو سعادتو ومملكتو ما حضانة هاد عم يبكي وهاد عم ينط ومرتو ماعم تتحكى واغلب وقتا راسا بجوالا والرجال بحب يوصل ع بيتو يلاقي كل شي مرتب وجاهز غزل: طيب وهوي مالو مسؤوليات وواجبات لازم كل شي أنا أنا أنا مرام: أكيد وفراس أكتر واحد بيهتم بهالموضوع نسيتي كيف تدريس الولاد مسؤوليتو وكمان مشوار يوم الجمعة ما بينقطع ولازم انتي تعرفي كيف تجيبيه لصفك اتنهدت وأنا عم أسمع كلام أختي مرام مع إني ما مقتنعة بكل شي عم تقولو لان عصبيتي كانت كبيرة وطاغي على كل مشاعري .. وتفكيري كان واقف نوعا ما لأن بهاد اليوم كانت المصيبة الكبرة يلي دمرت حياتي. بعد ما طلعت أختي وقفت عالشباك المطل ع الشارع وشفتو عم يحكي مع جوز أختي وواضح شقد معصب ما أهتميت اتمددت بسرير بنت أختي وحطيت أغنية حزينة بتعبر عن كل مشاعري هلق ولتزيد مأساتي أكتر!! { كلو كذب ما حدا بيعشق حدا.. ما بينعتب علّي المشاعر فاقدها.. منك صعب يشفى قلب.. ضيعت دقاته سدى.. علمتني داوي الجرح بالجرح.. خليتني فكر بحالي صح.. ربيتني بكيتني ع سنين عمري الآخدها.. دمعي نشف راح الوجع مني.. عم أكتشف جرحك شو خادمني.. رجعلي قلبي لا إلي.. حسسني شو دمعي غلي.. كنت بحياتي مرحلي وكتير في بعدها.. كلو كذب.... } يوم ورا يوم كنت عم فكر بكل شي .. تركت ولادي ببيت زوجي وحردت عند أختي مرام بعرف ما كنت رح أخلص من كلام أهلي لأن فراس كان إختياري وانا كنت قالتلة حالي عزواجي منو.. أغلب قصص الحب بمجتمعنا بتنتهي بالفشل للأسف أو يمكن الأهل ما بشوفو يلي نحنا شايفينو أو يمكن العقل بكون معمي عليه والقلب بكون مشتغل شغلو وطاغي ع كل المشاعر .. ومننسى عاداتنا وتقاليدنا وأخلاقنا وتربايتنا !! .. رغم القناعة التامة بالشي الصح يلي عم نعملو لان تفكيرنا هيك بكون محدود ومحاوط بهالة بيضة نقية مابتسمحلك تشوف شي أبعد منها وبعض قصص الحب الخرافية وسعيدة الحظ بتنتهي بالزواج مثل قصة حبي مع فراس. كل ما كان ينذكر قدامي شي بخص الحب قلهن فراس .. كل ما شوف لقطة رومنسية ع التلفزيون أو بوست ع الفيس أتذكر فراس .. وبالفعل هوي كان كل حياتي بس للأسف نحنا زواجنا قضى على قصة حبنا !!. بتعرفو هاد الحب النقي والطاهر يلي بيخلق مع الإنسان أول ما يوعى ع الحياة هاد كان حبنا .. من أول ما فتحت عيوني ع الدنيا وكان عمري 11 سنة كنت شوف فراس دائما قبالي بأي مكان .. كان القدر يجمعنا سوا ع أي سبب بالسوق .. بالشارع .. وحتى لما اطلع من المدرسة كان يوصلني ع البيت يخاف عليي من النسمة الطايرة بقينا ع هالحال 3 سنين حب خالي من الألاعيب والخباثة او حتى الكذب .. لحتى صرت صف تامن يمكن صرت أوعى ومتلي متل أي بنت مراهقة بكون الحب شاغل تفكيرهن بس أنا حبي كان جاهز وكبران ومعشش جواتي .. بهالوقت صار يتقرب مني يحاول يحكي معي بس دائما كان عندي خوف ثقة أهلي فيي !! .. هالثقة كنت ما أققدر اخربا بس القلب لما بصير يفكر مكان العقل بيتغير كل شي وخصوصا كنت مراهقة صغيرة .. وحكيت معو بالسرقة وبقينا كمان 3 سنين ع هالحال كان حبنا عفوي ونقي وطاهر .. ما دائما نحكي نقطش كتير بس أنا بعرفو ناطرني لأكبر ليجي يخطبني وبالفعل أول ما خلصت البكلورية إجا .. انرفض كتير وعوائق أكتر وقفت بوجهنا وغير الناس وأهلي يلي عرفت بعلاقتنا وخلتنا نفترق عن بعض ورجعت عطيت وعد لأهلي ما عاد احكي معو ومن هاليوم خلص ما عاد في كذب والحمد لله رجعت ثقة أهلي فيي وبعرفو لساه بدو اياني وخليت كل شي للنصيب رغم حبي وشوقي الكبير الو ولحديثو بس مستحيل أعمل شي اغضب فيه ربي وأهلي .. رجع طلبني وبالنهاية وافق بابا بعدما شاف إصرارنا ع هالزواج وحمّلنا كل المسؤولية .. وأخيراً رح يتحقق حلمنا ونتزوج .. ما كنت حسو غريب عني لأن ببساطة ست سنين من عمرنا ما قلال وكانو كفيلات لنتعلق ببعض أكتر وخلال عدة شهور كانت حفلة الزواج.