اللهم لك الحمد ولدت بالسلامه فجر يوم الخميس تاريخ 8 يوليو من حوامل 6 اكتوبر خلصت 39 اسبوع ويومين طبعاً انا من دخلت التاسع امشي واسوي قرفصاء واشرب ومابقى شي ماسويته ولكن ماولدت تعبت طلعت روحي كل يوم اتمنى يمر وانا والده من التعب والثقل😅 واخر شي خلاص استسلمت قلت شكلي بخلص التاسع وبنتظر الموعد اللي معطيني اياه اللي اهو بيكون بكرا يوم الاثنين اخر موعد لي وبعدها يسوون لي طلق صناعي ولكن سبحان الله يوم الاربعاء كنت احس بتعب والم جديد وماتوقعت ان طلق 😅 بدا يشتد معاي من الساعه 11 بالليل كان يجيني تقريباً كل ربع ساعه الم قووي ويروح على طول كلمت زوجي اعطيه خبر لأن مداوم اخر ليل وقلت له بنتظر لين يزيد علي الالم بقولك توديني المستشفى وللامانه كان على بالي ان بس الم كذا وبيروح أبداً ماتوقعت ان طلق صجي🤣 صبرت تقريباً لين الساعه 1 بالليل وازيدكم من الشعر بيت مسويه لي نودلز كوري حار وقاعده اكل برغم الالم اللي يروح ويجي😂 بس جات الساعه 1 حسيت ان الالم يجي كل 8 دقايق وصار اقوى كلمت زوجي قلت له تعال ودني ماقدر خلاص وجا ورحنا طيران ع الطوارئ حطولي التخطيط وكل شوي الالم يزيد علي 🤕 وجات الدكتوره فحصتني قالت لي بنوديك ولاده مفتوح 4 من بعد مافحصتني خلاص احس ابي استفرغ عزكم الله من الالم وابغى اروح الحمام وماني عارفه وش اسوي من الالم😩 ودوني غرفة الولاده على طول قلت لهم بطني ابي ادخل الحمام مارضو لي قالو لي بس بسرعه وطلعي شافوني بطول قالو لي قومي خافو اني احيب العيد واولد ف الحمام🤣 ويحطوني ع السرير ويعزكم الله من قو الالم استفرغت ثلاث مرات وقتها اذن الفجر وجات الدكتوره تفحص وفكت ماي الجنين وقالت لي انفتح 6 ان شاء الله قريب ولاده قلت لهم ابي زوجي مايصير يدخل 😫 قالو بنخليه يدخل 5 دقايق قلت اوكي موافقه نادو لي اياه خلوني معاه قالت لي الدكتوره اذا تحسين بدفع خبرينا اقولكم شفت زوجي بس ويزيد الطلق يزيد وفجأه قاعده احس بدفع واقوله روح قولهم احس بدفع ماقدر وقعدت اون من الالم 😩😩😩 جاو بسرعه وقالو له انتظر برا وانا ادفع مو حاسه والدكتوره والممرضات يقولي انتظري انتظري لاتدفعين خليتهم يركضون ف الغرفه 😂 اللي يشيل السرير واللي ترفع رجولي سبحان الله كل شي جا ورا بعض وبسرعه 🥲 وقعدت ادفع ادفع واوقف وادفع واوقف اخر شي قالت خذي نفس ودفعي دفعه طويله لا توقفين وطبعاً ماسوولي شق العجان عشان كذا شوي طولت ف الدفع عشان يطلع راس الجنين لكن اللهم لك الحمد ذفعت دفعه اخيره وطلع الشيخ زايد بالسلامه 🥺😫😫 وشعور الراحه اللي بعدها ماينوصف لما حطوه في حضني 🥺 اللهم لك الحمد كانت ولاده سهله وميسره وسريعه رحت ع المستشفى 2 تقريباً بعد الفجر انا ولدت اللهم لك الحمد واتمنى لكم كلكم ولاده سهله سريعه مثل ولادتي الله يهون عليكم جميعاً واسفه طولت عليكم بس حبيت اقولكم سالفة ولادتي🙏🏻